راولپنڈی : عارضہ قلب میں مبتلاء وفاقی وزیر داخلہ رانا ثناءاللہ کے دل کے ساتھ جدید ترین پیس میکر نصب کردیا گیا۔ دی نیوز میں صالح ظافر نے رپورٹ کیا کہ آرمڈ فورسز انسٹی ٹیوٹ آف کارڈیالوجی (اے ایف آئی سی) راولپنڈی کے ڈاکٹروں نے وفاقی وزیر داخلہ رانا ثناء اللہ خان کے دل کے ساتھ جدید ترین پیس میکر کامیابی سے نصب کر دیا ہے، پیس میکر درست طریقے سے کام کر رہا ہے اور انہیں آج انسٹی ٹیوٹ سے ڈسچارج کر دیا جائے گا۔
اس حوالے سے ڈاکٹروں نے بتایا کہ پیس میکر لگانے سے وفاقی وزیر داخلہ کے دل کے کام کو بہتر بنانے میں کافی مدد ملی ہے، اس کے باعث رانا ثناءاللہ اب بغیر کسی پریشانی کے عام زندگی گزارنے قابل ہوں گے اور وہ اپنے معمول کے امور بنا کسی طبی پریشانی کے سرانجام دے سکیں گے۔
واضح رہے کہ وفاقی وزیر داخلہ رانا ثناءاللہ کو چند روز قبل طبیعت ناساز ہونے پر ہسپتال منتقل کیا گیا تھا، رانا ثناء اللہ کو دل کی تکلیف کے باعث اے ایف آئی سی راولپنڈی لے جایا گیا کیوں کہ جمعہ کے روز وفاقی وزیر داخلہ رانا ثناء اللہ کی طبیعت ناساز ہو گئی جس کے بعد انہیں ہسپتال لے جانا پڑا، طبیعت خراب ہونے پر انہیں اےایف آئی سی راولپنڈی لے جایا گیا، اے ایف آئی سی میں 8 گھنٹے تک وفاقی وزیر داخلہ کا طبی معائنہ کیا گیا۔
بعد ازاں اس حوالے سے وزیر داخلہ کی جانب سے بھی بیان جاری کیا گیا، جس میں رانا ثناء اللہ کی طرف سے بتایا گیا کہ کافی عرصہ پہلے میری 2004 میں دل کی سرجری ہوئی تھی، دو تین سال بعد چیک اپ ضروری ہوتا ہے، دوست اور چاہنے والے آپریشن تھیٹر میں میری تصویر دیکھ کر پریشان ہوئے، میں بالکل خیریت سے ہوں معمول کے چیک اپ کے لیے ہسپتال آیا تھا، روبہ صحت ہوں انشا اللہ ایک آدھ دن میں آپ کے درمیان ہوں گا، ہسپتال میں رش کرنے کی ضرورت نہیں ہے اتوار تک گھر آجاؤں گا۔
