شہدادپور(رپورٹ عباس رضامحمدانی نمائندہ نوائے جنگ برطانیہ/لاہور)ینگ فزیو تھراپسٹ کمیونٹی پاکستان سندھ کی صوباٸی کنوینٸر ڈاکٹر خدیجہ ملک نے شہدادپور کا دورہ کیا۔ اس موقع پر انھوں نے ضلع بھر کے فزیوتھراپسٹ کے ایک اجلاس سے خطاب کرتے ہوٸے کہا کہ آزاد اور خودمختار فزیو تھراپی کونسل کا قیام ناگزیر ہے۔ اس سلسلے میں ینگ فزیو تھراپسٹ کمیونٹی ملک بھر میں سراپا احتجاج ہے۔ جس طرح پوری دنیا میں فزیو تھراپی کونسل آزادانہ طور پر کام کر رہی ہیں اسی طرح حکومت فوری طور پر پاکستان میں آزاد حیثیت سے فزیو تھراپی کونسل کے قیام کی منظوری دے۔ انھوں نے کہا کہ پچھلی حکومت میں فزیو تھراپی کونسل کا بل اصولی طور پر منظور ہوا تھا لیکن موجودہ حکومت نے فزیو تھراپی کو الاٸیڈ کونسل کا حصہ بنا کر فزیو ھراپی کے مستقبل کو تاریک کر دیا ہے۔ اگر فارمیسی, نرسنگ, ہومیوپیتھی, طب اور ساٸیکالوجی کی آزادانہ کونسل بن سکتی ہے تو فزیو تھراپی کونسل بھی فوری طور پر بناٸی جاٸے تاکہ ملک کے تین لاکھ فزیو تھراپسٹ گریجویٹ ہیلتھ کے شعبے میں اپنا کردار ادا کر سکیں۔ انھوں نے کہا کہ اگر ینگ فزیو تھراپسٹ کمیونٹی کے مطالبات نہ مانے گٸے تو ملک گیر احتجاج کیاجاٸے گا۔ ینگ فزیو تھراپسٹ کمیونٹی کو اپنے مساٸل کے حل کے لٸے متحد ہو کر کوشش جاری رکھنا ہو گی۔
