ممبئی : بھارتی ریاست مہاراشٹر کے ایک پولیس سٹیشن میں اس وقت پریشان کن صورتحال پیدا ہوگئی جب خواجہ سراؤں نے تھانے میں کپڑے اتار دیے، یہ دیکھ کر پولیس اہلکار تھانہ چھوڑ کر ہی بھاگ گئے۔
بھارتی میڈیا کے مطابق ملکا پور شہر میں ایک خواجہ سرا کے گھر 50 لاکھ روپے کی ڈکیتی کی واردات ہوئی۔ خواجہ سرا کی درخواست میں بعض مشکوک افراد کو نامزد کیا گیا لیکن پولیس نے ان کے خلاف کوئی کارروائی نہیں کی۔
کئی روز تک انصاف نہ ملا تو کئی شہروں کے خواجہ سراؤں نے اکٹھے ہو کر پولیس سٹیشن پر دھاوا بول دیا اور اپنے مخصوص انداز میں احتجاج کرکے تھانے کو سر پر اٹھالیا۔ شور شرابے کے باوجود بھی پولیس نے بات نہ سنی تو خواجہ سراؤں نے اپنے کپڑے اتار دیے اور تھانے میں ہی دھرنا دے دیا۔ یہ غیر متوقع صورتحال دیکھ کر پولیس اہلکار تھانہ چھوڑ کر باہر بھاگ نکلے۔ کئی گھنٹے کی ہنگامہ آرائی کے بعد خواجہ سراؤں کو انصاف کی یقین دہانی کے ساتھ راضی کیا گیا۔
