لاہور: لاہور سمیت پنجاب کے مختلف شہروں میں بارش سے گرمی کا زور ٹوٹ گیا۔
صوبائی دارالحکومت کے مختلف علاقوں ایبٹ روڈ، ماڈل روڈ اور اسلام پورہ کے اطراف میں گہرے بادلوں اور ہلکی بارش سے موسم خوشگوار ہوگیا ہے،
محکمہ موسمیات کے مطابق شہر کا موجودہ درجہ حرارت 31 ڈگری سینٹی گریڈ ریکارڈ کیا گیا ہے، کم سے کم درجہ حرارت 29 ڈگری سینٹی گریڈ جبکہ زیادہ سے زیادہ 36 ڈگری سینٹی گریڈ تک جانے کا امکان ہے۔
گجرات، جہلم اور دیگر شہروں میں موسلادھار بارش سے نشیبی علاقے زیر آب آگئے، گلی محلے تالاب کا منظر پیش کرنے لگے، متعدد فیڈرز ٹرپ ہونے سے بیشتر علاقوں میں بجلی کی فراہمی معطل ہوگئی۔
محکمہ موسمیات کے مطابق خیبرپختونخوا کے بالائی علاقوں میں بھی بارش کا امکان ہے، اپر دیر، سوات، کوہستان، وزیرستان میں برسات متوقع ہے، اس کے علاوہ بلوچستان میں خضدار، کوہلو، بارکھارن میں بادل برس سکتے ہیں۔
