جہلم:) جہلم کے صدر تھانے کی حدود میں حاملہ خاتون کو 5 افراد نے مبینہ طور پر اجتماعی ریپ کا نشانہ بنا ڈالا۔میڈیا رپورٹ کے مطابق پنجاب کے شہر جہلم کے علاقے صدر میں ملزمان خاتون کے گھر میں گھسے، ملزمان نے خاتون کے شوہر پر تشدد کیا اور اسے رسی سے باندھنے کے بعد خاتون کو اجتماعی زیادتی کا نشانہ بنایا۔
پولیس حکام کے مطابق خاتون کا طبی معائنہ کرایا گیا ہے اور اس کے خون کے نمونے فرانزک ٹیسٹ کے لیے لاہور بھجوا دیے گئے ہیں جب کہ پولیس نے متاثرہ خاتون کے شوہر کی شکایت پر مقدمہ درج کر لیا ہے۔انسپکٹر جنرل پنجاب پولیس راؤ سردار علی خان نے واقعے کا فوری نوٹس لیتے ہوئے راولپنڈی کے ریجنل پولیس افسر سے رپورٹ طلب کر لی ہے۔
جہلم پولیس نے واقعے کے چند گھنٹوں کے اندر ہی مقدمے کے تین ملزمان کو گرفتار کرلیا جب کہ گرفتار ہونے والوں میں مرکزی ملزم بھی شامل ہے جو پیشے کے لحاظ سے رکشہ ڈرائیور ہے۔ڈسٹرکٹ پولیس افسر کامران ممتاز نے بتایا کہ ایک خصوصی ٹیم تشکیل دی گئی ہے جو فرار ہونے والے دیگر ملزمان کی گرفتاری کے لیے چھاپے مار رہی ہے۔
