آصف زرداری کیخلاف سوئس مقدمات دوبارہ نہیں کھل سکتے، نیب

اسلام آباد: سپریم کورٹ میں این آراو کیس میں نیب نے مؤ قف اپنایا ہے کہ سابق صد آصف زرداری کے خلاف سوئس مقدمات دوبارہ نہیں کھل سکتے۔

قومی احتساب بیورو (نیب) نے این آراو کیس میں 2 صفحات پرمشتمل جواب سپریم کورٹ میں جمع کرادیا ہے جس میں مؤقف اختیار کیا گیا ہے کہ سابق صدرآصف علی زرداری کے خلاف سوئس مقدمات نہیں کھل سکتے، سوئس مقدمات سے متعلق پاکستان کی طرف سے کی جانے والی اپیل زائد المعیاد ہونے پرخارج ہوئی، نیب میں آصف علی ذرداری کے خلاف مختلف مقدمات زیرسماعت ہیں مگر این آراو سے متعلق نقصان کی تفصیلات موجود نہیں تاہم نیب دستاویزات حاصل کرنےکی کوشش کررہا ہے۔

نیب نے جواب میں کہا کہ سابق اٹارنی جنرل ملک قیوم کے خلاف اختیارات کے غلط استعمال کے حوالے سے باقاعدہ انکوائری کی گئی تاہم اس وقت کی نیب اتھارٹی نے کہا کہ اختیارات کےغلط استعمال کے شواہد نہیں ملے، ملک قیوم نے قانون کے مطابق ہی خط لکھا تھا اسی وجہ سے سابق اٹارنی جنرل ملک قیوم کے خلاف انکوائری ستمبر 2012 میں بند کردی گئی، نیب کو اب عدالت جوبھی حکم دے گی اس پرمکمل عمل کیا جائے گا۔

اس خبر پر اپنی رائے کا اظہار کریں

اپنا تبصرہ بھیجیں